【最有米聯賽】今屆英超20支球隊獎金分成羨慕死人

文：MenClub Mr.波特　　圖：互聯網
POSTED ON 07 Jun 2017


今屆英超較早前已經全數落幕，而英超官方亦隨即公佈今季20支英超球隊嘅收入同埋獎金分成，其中作為英超冠軍嘅車路士一共獲得超過1.5億鎊嘅收入，而即使係聯賽最後一位嘅新特蘭亦有9300多萬鎊嘅收入，可以證明英超真係世界最搵錢嘅足球聯賽。

由於英超喺今季前同天空電視台及BT Sport簽左一份為期三年(2016-19年)新嘅轉播合同，總價值達到51.36億鎊，就係因為咁所以今季喺新轉播合同正式執行下，各支球隊都獲得非常可觀嘅收入。

而喺英超聯賽嘅收入裡面就分成左幾部份，其中包括名次獎金、保底電視分成、國內電視轉播分成、海外電視轉播分成以及英超整體商業收入分成。名次獎金就係以194萬鎊做單位，球隊每排名高一位就會加194萬鎊；保底電視分成則係睇你有幾多場轉播賽事，越多轉播收入就越高；最後三種分成就係全部20支球隊一齊平分。

以聯賽冠軍車路士黎做例子，佢喺英超排名第一，所以佢嘅名次獎金就係194萬鎊x20，即係有3883萬鎊，而佢地今季有28場轉播賽事，所以保底電視分成達到3282萬鎊，而其後三樣分成分別為3530萬鎊、3909萬鎊、476萬鎊，所以全部5樣加埋佢，車路士喺英超今季嘅收入就有1.5億鎊，係全英超之冠！

即使係全英超倒數第一嘅新特蘭，佢地喺20支球隊平分嘅分成入面已經獲得超過7800萬鎊收益，再加埋其餘兩項浮動嘅收入大慨1500萬鎊，就係咁佢地成續雖然令人慘不忍睹，但係一季落黎佢地都喺英超賺到9300萬鎊，真係唔到你唔服。雖然好似新特蘭咁來季要降班，但係佢地手握接近1億鎊嘅收入，都係可以買到唔少具質素嘅球員，為來季重返英超而努力。

除左20支英超球隊，其實英超聯賽方面亦會為上季或以前降班嘅球隊著想，佢地都可以從呢份新轉播合同中獲得部份分成，好似上季降班嘅阿士東維拉、紐卡素同埋諾域治咁，佢地每隊今季就可以獲得4000萬鎊嘅收入分成，對於佢地一支英冠球隊黎講都真係一筆大數目。而喺再早一啲降班嘅球隊，好似卡迪夫城、富咸、昆士柏流浪、雷丁以及韋根，佢地亦都從中獲得超過1600萬鎊嘅收入分成。

對比起其他聯賽，英超球隊嘅收入無疑係極之巨大的，特別係弱旅都可以有咁巨大嘅收益，真係羨慕死其他聯賽嘅球隊。不過，正正因為各支球隊都擁有巨額收入，所以佢地都擁有本錢去買一啲價值較高嘅球員，從而令球隊之間嘅實力唔會有巨大嘅分別，就算係榜尾嘅球隊都有能力擊敗聯賽前列嘅球隊，所以英超先比人稱之為世界上最激烈嘅足球聯賽呢！