【第四人？】UEFA確認新規則，加時賽將可換上第4名球員

文：MenClub Mr.波特　　圖：互聯網
POSTED ON 03 Jun 2017


相信作為球迷嘅你，對於正規嘅足球比賽入面，一支球隊最多可以替換3名球員呢條規則應該一啲都唔會陌生，但係今日歐洲足協決定打破呢個常規，佢地宣佈將會允許球隊喺比賽進入加時賽時，派出第4名球員進行替換。

目前嘅足球比賽，無論比賽打至幾多分鐘，又或打至任何情況，一支球隊最多就只可以替換3名球員，如果已經換晒3位球員，而之後又有球員傷出嘅話，咁個支球隊就被迫打少一個人。正因為咁，教練們對於佢地嘅換人名額都非常慳，唔到最後一刻重要關頭都唔會隨便換人。但係宜家歐洲足協嘅新規則，就令到教練們多左一個選擇，就係喺法定時間90分鐘換晒3個後備球員後，唔使再擔心加時賽1個人都換唔到。

當然，歐洲足協呢個新安排唔會咁快喺大賽入面使用，而將會先喺較小型嘅賽事，好似即將舉行嘅男子及女子嘅U17、U19歐洲賽入面試行。如果反應好，而情況又喺控制之內，咁相信未來將呢條規則推入大賽亦絕對可以，同時相信會受一眾教練歡迎。

雖然今次嘅規則影響睇落好似唔係好大，正常比賽進入加時嘅情況並唔多，但喺國際大賽上出現加時賽就真係唔少啦，特別係歐聯、歐國盃以至世界盃都經常喺決賽或4強入面出現加時賽，咁係因為比賽雙方都唔敢胡亂進攻，總係以安全為先，所以都好容易將比賽拖入加時，而以往教練喺90分鐘內唔會用晒啲換人名額，但係宜家就可以令佢地更可以喺90分鐘內放手一搏，用盡3個換人名額，真係再打和嘅先動用埋加時賽新增嘅換人名額。

今次歐洲足協嘗試改例，其實已經唔算係咩新鮮野，因為早喺去年年底嘅世界冠軍球會盃決賽入面，皇馬後備射手莫拉達就曾喺加時賽以第4名後備身份入替C朗拿度。而喺今季英超嘅足總盃8強或之後嘅比賽，亦都已經安排左加時賽可換第4人嘅新規則。

歐洲足協今次推加時賽增加1名換人名額，其實都係想保障球員們嘅健康同體能，因為喺加時賽好多時球員都會踢到抽晒筋，咁到時呢個換人名額就變得好重要。同時，換入後備亦都可以確保球場上有更多有氣有力嘅球員，而唔係大家都係等12碼，咁就會認識比賽嘅可觀性啦。