球季就到尾聲，歐霸四強都全部誕生，最矚目一定係法甲球隊摩納哥事隔14年後再進軍歐聯四強，八強次回合回歸主場再贏多蒙特3-1絕對有說服力。事實上摩納哥今季表現都好出色，法甲越打越有目前同PSG同分，如果入埋歐聯決賽，今季摩納哥都真係雙喜臨門。

同2004年嗰次奇蹟殺入歐聯決賽比較，兩隊摩納哥最相似嘅就係同樣有失意前鋒重生。2004年就有喺皇馬借返嚟嘅摩連迪斯，當時佢要同同胞魯爾同朗拿度兩個世界級射手競爭，想有出場機會當然難上加難，最後被皇馬外借摩納哥。你以為摩連迪斯真係唔夠班？佢就親身證明自己嘅實力，喺八強倒戈皇馬兩回合都有入球，直接踢走放棄自己嘅球隊黎證明自己。值得一提嘅係因為皇馬呢次自作自受，令往後唔少球會外借球員時都加入唔可以倒戈嘅條款。更威水嘅係，雖然摩納哥當年決賽輸俾摩連奴帶領嘅波圖飲恨，但摩連迪斯就成為嗰屆歐聯神射手。

而今季呢隊摩納哥，一樣有失意前鋒咸魚翻生，講緊嘅係哥倫比亞前鋒法卡奧。法卡奧一度係轉會市場大紅人，唔少大球會都想引入呢位入球機器，可惜2014世界盃前重傷後，外借曼聯同車路士都極之唔順利，最後唯有諳然回歸摩納哥。舊年夏天仲有傳摩納哥可能會繼續外借其他球會，不過最後都無成事。不過又估唔到老虎返到嚟又打得返起，目前喺法甲入咗18球，而歐聯都有6球進賬，無論法甲定歐洲賽，法卡奧都係摩納哥嘅進攻主力，加上有「新亨利」之稱嘅基利安洛天，摩納哥攻力非同少可！。

摩納哥喺四強將會面前祖雲達斯，嚟到呢個階段，大家都係實力同運氣兼備，都無話好籤唔好籤，或者祖記實力不如皇馬或者馬體會，不過老婦人失落歐聯冠軍近20年，今次嚟到四強一定搏盡。祖雲達斯防守唔係人咁品，摩納哥領隊渣甸就話唔會放棄進取嘅打法，既然係咁，就祝你好運啦。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。