只要你對人體有少少認識，都會知道男性下體並無骨骼存在，但冇骨就唔代表唔會斷，而且有時意外同幸福一樣，有時可以來得非常突然。好似近日外國媒體就報導，有位突尼西亞27歲男子，只係瞓覺時轉咗個身，就整斷咗自己下體，結果下體腫到如矮瓜一樣，仲痛住等咗36個鐘先做到手術，手術完4日先可以正常去廁所，真係睇字都覺得縮一縮呀。

據英國《每日鏡報》報導，早前為呢名男子做接駁手術嘅醫生，將整個個案分享到醫療期刊之上。據知該名男子某日瞓瞓下覺時一個轉身，然後就聽到「啪」一聲，下體立即傳來劇痛。該名男子最後等咗36個鐘先見到醫生，而醫生發現佢嘅下體腫漲而且呈紫色，有如矮瓜一樣，符合下體折斷時嘅「矮瓜變形（有圖，慎人）」病癥，所以斷定佢自己壓到勃起中嘅下體造成折斷。仔細檢查後亦證實佢下體組織有兩個分別大10mm及7mm、相隔3cm嘅傷口，需作縫針治療

男性下體內總共有三個海綿體，當中兩個為可以充血、產生勃起作用嘅「陰莖竇狀海綿體」，而其外又有一層堅韌有彈性嘅「白膜」包覆。而當下體充血之時，因姿勢或施力角度導致上述兩個部位受損，就係所謂嘅「下體骨折」。受傷後下體亦會因為出血而腫大變紫，而且需要手術縫補傷口，否則可能會導致海綿體日後無法充血勃起。

而上文中嘅27歲男子於手術後兩日後消腫、四日後可以正常去廁所。另外，《每日鏡報》亦引述英國國民保健署（NHS）嘅報告，指2019年全英國其發生164次下體骨折事件，比起2015年嘅數字高38%，但NHS亦表示實際數字一定「遠比164次多」，事關有部份男士會羞於求醫。

資料來源：Mirror.co.uk