都市人越黎越夜瞓，但返工時間就咁多年黎都冇變，於是唔少人都習慣一到週末就死都唔願瞓。但近日一個日本研究就發現，放假時夜瞓，原來會影響平日時嘅精神狀態。

京都府立醫科大學嘅八木田教授日前公佈研究，指佢哋分析咗府內大約3500名高中生於返學日嘅睡眠時間以及起床時間，以及756名高中生嘅假日睡眠習慣後，發現如果「平日睡眠時間」與「假日睡眠時間」相差2個鐘或以上 (例如平日12點瞓，但放假就3點先瞓，稱之為「社會性時差」)，有42%受訪高中生表示「睡眠質素變差」、50%高中生表示「日頭會好眼瞓」；相對地「社會性時差」低於兩個鐘嘅話，認為睡眠質素變差以及日頭會好眼瞓嘅高中生只有18%及31%。

研究得出嘅結論係如果平日同假日嘅睡眠習慣有太大不同，其實係會影響大家嘅睡眠質素及學習能力，換言之要維持睡眠質素及學習能力，大家平日、假日嘅瞓覺時間唔能夠相差太遠，一係就日日都夜瞓，一係日日都早瞓。

資料來源：jiji.com via Yahoo! News