來自東京表參道嘅Omotesando Koffee自早年於灣仔開幕後，一直都係城中咖啡愛好者嘅聚集地，而早前Omotesando Koffee亦進駐尖沙咀K11 Musea開設全球第九間分店。新店其中一個賣點，就係店內有埋姊妹品牌Koffee Mameya，提供一對一咖啡師私人服務，為咖啡愛好者提供更貼身嘅體驗。

K11 Musea中嘅Koffee Mameya乃係除日本本店之外全球第二間分店，亦係目前唯一一間有位坐嘅Koffee Mameya。其概念係透過90分鐘專屬時間，等客人與駐店咖啡師交流平時飲咖啡嘅愛好、習慣，再由咖啡師為客人推介最適合嘅咖啡豆以及沖泡方法。而客人除咗可以買豆返屋企慢慢嘆之外，亦可以選擇即場由咖啡師於眼前沖泡，從中交流心得技巧。

Koffee Mameya嘅駐場咖啡師全部都擁有豐富專門知識，唔單止可以令大家更為了解咖啡沖泡方法及風味，亦可以為大家介紹世界各地的咖啡文化及特色。而目前店內提供25款風格各異嘅時令單一產地咖啡豆，當中有部份更係相當罕見嘅微批次咖啡豆，再加上日式禪意簡約風裝潢，為咖啡愛好者提供與別不同嘅體驗。

但要留意嘅係，由於Koffee Mameya座位有限，所以客人須要使用K11 Musea嘅手機App先行預約。

KOFFEE MAMEYA

地址： 尖沙咀梳士巴利道18號Victoria Dockside K11 Musea B2樓B217號舖

營業時間：11am-6pm (星期一至五) 、12pm-7pm (星期六、日及公眾假期)