中超財雄勢大，你睇班巴西球員一車車咁爭住去中國「證明自己」，就知呢度係掘金好去處。雖然無錢係萬萬不能，但係就算有錢都唔一定係萬能，好似目前效力屈福特嘅尼日利亞前鋒恩哈路，雖然啱啱以2000萬鎊轉投中超球隊長春亞泰，但事後佢就表示，如果有得揀，情願留喺英超，都唔想去中國賺19萬鎊週薪喎。吓？有錢，真係唔要？

曾經效力烏甸尼斯同格蘭納達嘅恩哈路表現一向唔錯。15/16球季屈福特升上英超時一季入咗20球，上季都有17球。每次講起英超中下游當打射手，除咗李斯特城嘅占美華迪都一定有佢份，上季更有傳阿仙奴希望將佢收歸旗下。不過今季恩哈路表現就非常失色，打咗18場都係入得兩球，加上屈福特一直希望可以重組鋒線，所以冬季轉會窗就積極幫呢位尼日利亞射手搵新東家，難得中超肯出到2000萬鎊，對屈福特呢間細球會嚟講算係幾大數目，所以就拿拿臨放人。

可能大家都覺得恩哈路去中國雖然要吸霧霾，不過有19萬鎊周薪咁fat fat都抵啦，但其實佢本人就想留喺英超多啲。事實上西布朗同水晶宮都對佢都好有興趣，可惜出價唔啱屈福特心水。而恩哈路已經身為人父，小朋友都喺英國讀書，無理由一家大細一齊去中國，又或者分隔兩地咁傻豬架。恩哈路仲自爆，佢之前曾經收到比依家高三倍嘅中超合約，但佢都不為所動，為嘅就係留喺英超，因為佢自覺仲可以為英超貢獻到更多，就算今次去長春亞泰都只係因為希望屈福特賺多些少咋。

恩哈路唔係乜嘢大球星，英超或者歐聯冠軍相信都唔會有佢份，襯仲有青春搵真銀其實無錯。不過佢無向錢低頭，積極希望留喺英超接受挑戰，呢種堅持係好值得大家欣賞。其實恩哈路今年先27歲，過多兩年——或者更快——都仲可以回歸英超。反觀不斷以轉會中超搵大錢作為目標嘅幾位巴西球員，反差就真係好大。點解曾幾何時充滿快樂同喜悅嘅巴西足球變到咁重銅臭？定覺得巴西嘅前輩幫國家贏咗5次世界盃就滿足？