唔少日本女演員於出道初期都會拍寫真衝下人氣，後來更成為一線當紅女星。而今晚要介紹嘅呢位「森山未唯」，就好可能呢條路上嘅下一個成功例子。事關佢唔單止演出受人稱讚，就連寫真成績都非常好！

下個月就26歲嘅「森山未唯」出生於日本神奈川縣。早喺佢7歲時，就已經用「 松浦未唯」之名，打敗超過2000名參加者，成為料理綜藝節目《笑顔がごちそう ウチゴハン》嘅童星而出道，後來仲參加過電視劇演出。但到佢升中學時，就因為想專注於學生生活而停止演藝活動，直到大學時聽到日本著名導演「奈良橋陽子」嘅演講，先再次對演戲產生興趣。於疫情期間佢先係參加日本大學生選美「CampusAward 2021」並獲得兩個獎，之後就吸引到經理人公司與佢簽約，於2022年改以目前嘅「森山未唯」再次出道。

而要講到佢嘅成名作，就一定要數自2023年起佢多次出演日本綜藝節目《水曜日のダウンタウン》中單元劇《名探偵津田》，從一開始飾演一個配角大學生，到太受歡迎而再次出演，第四次出演時更已經榮升單元主角，大大打響其知名度。

除咗演員工作外，佢嘅寫真成績亦相當亮眼。2024年8月為《週刊Young Jump》獻出處女寫真，並隨住《名探偵津田》播出而衝上銷量鎊第一名；去年2月為《週刊Playboy》拍電子寫真，又因為銷量太好搞到雜誌緊急邀請佢4月時於雜誌亮相。去年12月《週刊Young Jump》更配合佢再次演出《名探偵津田》而再邀請佢拍寫真。有如此強大嘅宣傳策略，相信「森山未唯」於演藝界及寫真界都可以好快殺出成功之路啦！

IG：myumyu_0314