正所謂鹹魚白菜各有所好，喺欣賞美女呢方面，每個人都會有唔同嘅口味，好難有一個靚嘅絕對標準。但今晚要為大家介紹嘅「齋藤恭代」，由出道至今就獲得日本媒體以至網民一致追捧，甚至被冠上「完美Body」、「最高女神」、「壓倒性的美」等超誇張嘅稱號。唔知佢又符唔符合大家嘅口味呢？

現年29歲嘅「齋藤恭代」出身於日本栃木縣。中學時間因為通過當地雜誌嘅選秀而成為地區偶像成員，但由於當時已經廿歲嘅佢同其他成員年齡差距過大，所以萌生離團嘅念頭，於是作為與經理人公司嘅交換條件而決定參加「地球小姐」嘅日本區選美比賽，最後亦真係成為日本代表得以離開。

後來佢曾經加入另一經理人公司旗下嘅女團，但因為收入不足所以開始擔任攝影會模特兒，結果佢173cm高、九頭身比例，以及從小練習器械體操得返黎嘅姣好身段獲得一致好評。最後吸引到《週刊Playboy》嘅寫真邀約，並火速成為寫真界嘅當紅女星。

咁實際上佢究竟有幾受歡迎呢？從2022年寫真出道至今，佢同各大雜誌合作出過至少30次電子寫真，換言之即係幾乎每個月都有新作；同時佢過去四年間每年都推出一本新實體寫真集，當中包括上月推出嘅新寫真《月刊 齋藤恭代》，上兩年又連續推出個人月曆；而寫真DVD方面，雖然佢每年只出一隻咁大把，但2024年推出嘅《無敵の女神》唔單止個名夠哂沙塵，成績亦係寫真界之冠。去年獲得《週刊Playboy》選為年度寫真總冠軍，同時又獲得《週刊SPA!》選出嘅「完美中的完美獎」。再加上每年數唔哂嘅雜誌寫真以至雜誌封面，可見佢嘅受歡迎程度！

IG：yasuyon4