談到日本偶像界，「AKB沒落」係近年不能避開嘅話題。畢竟當年就算你身在香港、一首AKB嘅歌都冇聽過，但你總會聽過「小嶋陽菜」、「大島優子」個名；依家要你講出AKB入面仲有咩人，可能已經係《百萬富翁》嘅50萬問題。但都係嗰句，我哋唔識，唔代表入面冇值得留意嘅人，事實上唔少從AKB成員，都係卒業之後先進入大眾目光。好似今晚要介紹呢位「福留光帆」就係其中之一啦。

今年即將21歲嘅「福留光帆」出身於日本兵庫縣，2019年先以兵庫縣代表身份加入AKB48嘅「Team 8」（Team 8係有縣代表嘅設定），無論係由團隊嘅人氣定係佢本人嘅年齡黎睇，佢嘅入團時間都可以話非常遲，仲要好死唔死撞著疫情嘅幾年。到佢首次參加AKB嘅公演時，就已經係2022年5月嘅事，而且公演第二日佢就於直播中宣佈退團，同年7月正式退團，結束3年幾乎冇嘢發生過嘅AKB生涯。

但畢業之後，佢嘅工作機會反而變多。例如自今年4月起，佢就接連成為日本賽艇比賽及相關節目嘅嘉賓；去年20歲生日前夕，亦於日本雜誌《BOMB!》獻出首次水著寫真，之後曾經同《週刊Playboy》合作推出電子寫真，近日再登上寫真雜誌《SUNNY GIRL》，展現出佢臉圓甜美，頗有初戀感覺嘅氣質。如果得到大家多多支持，話唔定能夠於寫真界闖出一番名堂架！

IG：fukutomemitsuho