田中美久於過去十年都係以AKB姊妹團「HKT48」嘅成員活動，進入2020年代更加可以話係團體嘅台柱。不過去年迎來入團十年後，佢就隨即宣佈從團體畢業。佢嘅離開對HKT48有咩影響我哋今日就唔講，反而想同大家講下佢單飛後對寫真界有咩影響，事關佢呢半年黎嘅寫真作品，簡直可以用噴發黎形容！

現年22歲嘅田中美久，早於2013年就加入「HKT48」，2016年起首次進入AKB系統嘅總選、2018年成為團體Center，同年再於AKB總選獲得第10，成為團體嘅皇牌成員。進入2020年代後，佢亦「夠秤」開始嘗試水著寫真，並於2021年推出首本個人寫真集《1/2少女》，並且於當中首次泳裝解禁，結果寫真集銷量超好，成為當時日本ORICON寫真集排行榜冠軍。佢嘅姣好身材更令佢成為日本演藝界出名嘅「美乳」代表

自此之後，田中美久偶爾都會為雜誌拍下寫真。不過自從佢去年宣佈團體卒業，今年1月正式換新公司後，佢嘅寫真作品數量就可以用「噴發」黎形容，淨係今年頭半年就已經做過至少8次少年雜誌封面女郎，電子寫真都出過兩輯。而且拍寫真令佢嘅Fans層大大擴展，本月初時佢就曾於X（Twitter）發文表示依家搭的士都會被司機認出，搞到唔敢直接去到屋企樓下落車，引來唔少Fans留言心疼女神受驚——其實如果佢喺香港就唔會遇到呢個問題啦，因為根本就上唔到的士嘛。

IG：mikumonmon_48