日本Abema TV嘅戀愛綜藝「今日、好きになりました。」近年可謂一力擔起小半個日本寫真界，事關節目每季都總能捧紅一兩個日本女高中學生參加者，而佢哋嘅下一步通常就係水著出道，進一步吸引少男讀者。好似今晚要介紹呢位「菜那セシル」，就已經係我介紹過第N位來自呢個節目嘅日本寫真新星。

相信大家睇相都會發現，現年19歲，擁有超白晢皮膚、淺啡色瞳孔嘅「菜那セシル」其實係個混血兒黎。據佢近日接受《NewsCrunch》訪問時透露，自小學生時期就因為睇得多少女時尚雜誌而想成為雜誌模特兒，後來又因為見到偶像「白石麻衣」既可以做雜誌模特兒，又有其他演藝工作，所以去年就決定參加「今日、好きになりました。 卒業篇」開拓自己嘅機會，結果就真係一下子爆紅。近日亦先後為《FRIDAY》及《週刊Playboy》拍攝寫真，展現出白到透明嘅肌膚，以及一對又長又直又白又滑嘅滿分美腿。

但大家唔好睇佢瘦蜢蜢、個樣楚楚可憐咁就覺得佢好好蝦，雖然佢自問唔係個非常外向嘅人，亦經常被朋友笑佢反應慢幾拍，但佢自少就同熱愛日本嘅爸爸一齊學習空手道，早早就已經係個空手道黑帶黎。另外佢亦提到自己精通四大泳式，可謂入水能游、出水能打。唯一弱點就係跑步，佢話自己跑得好慢喎——咁咪好易追囉？

IG：53_nana._.cecile