日本寫真界之所以不停有新血加入，一方面當然係拍寫真的確能為女仔帶來名氣、金錢、工作機會等好處；另一方面，就係其實唔少日本女仔都熱愛展示自己嘅「工口」氣息（エロ，E-ro，源自英文Erotic，可以理解成「色色的」）。部份人甚至已經去到有「工口職業病」嘅程度。好似今晚介紹嘅呢位「Yunocy」咁，其實就已經唔使拍寫真架啦，但佢就係鍾意！

現年25歲嘅「Yunocy」，早於16歲時就以「水沢柚乃」之名透過攝影會出道。據知佢當時其實係打算拍普通寫真，但應徵做模特兒時剔錯水著寫真嗰格，所以先硬住頭皮上陣，結果就一試愛上，而且佢寫真成績仲非常唔錯，2018年曾入選日本著名寫真女星比賽「Miss iD」嘅最終名單。

而佢嘅另一最愛就係打機。事實上佢當初選擇寫真經理人公司時，亦係睇中對方有好多遊戲相關嘅工作，所以先同對方簽約。點知出道後因為坊間對寫真女星嘅偏見，覺得佢扮打機上位，於是佢於2019年開始以「Yunocy」之名開YouTube做直播。2021年更直接將藝名改成「Yunocy」，以打機直播為主。

同年佢就被著名電競週邊廠商「Razer」睇中，成為日本首位與Razer簽訂專屬合約嘅女直播主。而佢嘅人氣亦一路節節上升，IG、Twitch等社交媒體嘅追蹤人數加埋有近150萬！但另一邊廂，佢其實亦冇放棄寫真工作，好似最近就為《週刊Playboy》拍攝新寫真，展現肉感恰到好處嘅曼妙身材。佢於訪問中仲表示，其實自己有「工口職業病」，一日到黑都諗緊點樣拍性感寫真，可能係蹲下時擠出事業線，又可能係摷亂件衫露出內衣，所以佢啲相先可以咁吸引咋！

IG：mizuyunosan_