我成日都話日本嘅《幪面超人》系列除咗本身好睇，對日本演藝界嘅另一重大意義就係每年都會捧出一個女新人。好似今晚要介紹嘅呢位「小貫莉奈」咁，就於8月先播完嘅《幪面超人GEATS》中飾演「幪面超人LOPO」我那霸冴。而其實脫下「拉打」衫之後，佢係一個擁有一對超絕美腳嘅清爽美女！

現年22歲仲讀緊大學、身高170cm、擁有10頭身比例嘅「小貫莉奈」。最早於2017年參加日本著名少女模特兒選秀比賽「超十代」，從約1.5萬名參加者中脫穎而出成為總冠軍而出道。後來再於2018年為寶礦力拍攝東京馬拉松宣傳影片，成為「寶礦力女孩三代目」而廣為人識。或者係因為高中時曾經係學校籃球隊隊長、加上「寶礦力」出身以及一頭短髮令佢感覺非常陽光有活力，所以往後唔少工作都同運動有關，例如2022年就成為東京籃球隊「Tokyo United」嘅YouTube頻道官方主持。

但你又唔好睇佢外型好似好Cool好高冷咁喎，其實私底下嘅係一個名符其實嘅宅女，甚至佢個IG嘅自我簡介都大大隻字寫住興趣係「動漫」。而佢近日再為《週Play》拍攝寫真時接受訪問，亦指自己放假嘅活動，就係同孖生細妹一齊去動漫主題Cafe、一齊睇動漫咁。最近仲同阿妹一齊睇《葬送的芙莉蓮》睇到喊。睇黎係一個充滿反差嘅少女呢！

IG：rina_onuki0529