AKB48曾經係日本首屈一指嘅偶像團體，但近年團體似乎風光不再，無論新舊團員都紛紛「跳船」，有傳媒估計單係今年截自8月尾，就已經有近30位AKB成員先後宣佈「卒業」。而今晚要同大家介紹嘅呢位「藤園麗」就係其中之一，而且佢似乎仲向住大家期望嘅方向發展——轉型做水著偶像！

今年一月先啱啱滿18歲嘅「藤園麗」，加入AKB嘅時間其實唔算長。佢最早於2018年時透過於家鄉鹿兒島市舉行嘅「第5回KKB夢応援フェスタ」，以「鹿兒島代表」身份加入團體嘅Team 8，後來於2021年兼任Team B成員，到今年3月就宣佈畢業、5月正式停止活動。換言之佢嘅偶像生涯其實不足5年，亦只參加過4隻單曲嘅製作。

據佢近日接受《FLASH》訪問時表示，其實眼見身邊好多隊友都離隊，佢亦早有類似打算。去年10月團體宣佈Team 8會於今年四月後停止活動 (後來更暫停使用隊伍制)，加上佢終於高中畢業，所以就決定從團體畢業。

而當被問到未來打算時，轉為個人活動嘅佢表示希望嘗試更多不同挑戰。而睇黎佢嘅第一步就係踏足寫真界。事關佢近期先後為《週刊Playboy》及《FLASH》拍攝水著寫真，而接受《週Play》訪問時亦指出希望仿傚團體前輩小嵨陽菜「走出屬於自己道路」，咁你話小嵨陽菜最出名係咩呀？咪就係寫真囉！相信大家都可以期特佢未來有更多靚相啦！

IG：reifujizono_official