過往多個兩性關係研究都證實，男女伴侶之間經常會出現所謂「高潮鴻溝 (Orgasm Gap)」，亦即於兩性生理結構、社會文化影響下，往往只有男性能夠於傳統嘅「插入性性行為」中獲得高潮，女性嘅「高潮率」大幅偏低。結果就因為女性唔滿足、男性見到女性唔滿足而又唔滿足，導致兩性「性滿足度」降低。而近日一個英、美研究就發現，「雙重自慰 (mutual masturbatiobn) 能夠有效提升兩性嘅「性滿足度」，或者會係解決「高潮鴻溝」嘅簡單方法。

所謂「雙重自慰」，其實就係於伴侶在場嘅情況下自慰，係「非插入性」嘅性行為之一。來自英國Southampton大學心理學系嘅研究員Dilan Kılıç (土耳其姓氏)表示，目前性治療師亦會鼓勵伴侶參與女性嘅自慰行為，讓女性能夠向伴侶示範自己如何獲得快感或高潮，以作為改善雙方性滿足度嘅契機。同時佢亦有感目前關於性滿足度嘅研究主要針對「插入性性行為」或者「單獨自慰」，所以希望進行新研究，了解「雙重自慰」對「性滿足度」嘅影響、兩性嘅觀感以及背後嘅阻力等等。

於是佢招募咗總共268名 (117名女性、151名男性) 年齡介乎18至65歲、處於一段至少一年嘅異性戀或女女同性戀關係嘅受訪者，並透過問卷詢問佢哋關於「雙重自慰」嘅行為及睇法。

結果就發現，有大約50%受訪者曾於調查前兩週內進行「雙重自慰」，而呢批受訪者嘅性滿足度為29.58 (40分滿分)，同時佢哋對於「雙重自慰」行為亦抱有正面感覺。

更重要嘅係，研究團隊發現「近期試過雙重自慰」與「性滿足度」之間有正面關係，亦即「近期有過雙重自慰」嘅人，其性滿足度會比「近期冇雙重自慰過」嘅人高。其背後原因可能係「雙重自慰」解決咗部份「高潮鴻溝」問題，令雙方嘅滿足度都更高；同時亦證實，雖然提出或初嘗試「雙重自慰」可能有啲尷尬，但對伴侶黎講其實係有正面作用，而且「性滿足」亦唔一定需要透過傳統性行為獲得。

資料來源：The Role of Mutual Masturbation within Relationships: Associations with Sexual Satisfaction and Sexual Self-Esteem