曾經聽人講過，依家進入「百歲時代」，所以依家嘅三十幾四十歲，無論外貌定行為都同當年嘅廿幾歲差唔多。我唔知大家有幾認同呢個說法，但今晚要同大家介紹嘅呢位「華彩なな」，雖然已經42歲、冇拍寫真15年、中間仲結埋婚生埋仔離埋婚，但睇落依然有當年廿令三十歲咁正！睇嚟「百歲時代」呢個說法都真係有啲根據！

剛於上週五迎來42歲生日嘅「華彩なな」，早於2002年出道，2005年時更因豐滿身材而獲得《Young Jump》「果凍身材Max」選舉總冠軍，但2011年就突然宣布寫真畢業，雖然仍有繼續出寫真DVD，但就主要以演員身份活動，2016年更宣佈結婚生仔，似乎過住幸福美滿嘅生活。

可惜嘅係，今年6月時佢於IG宣佈自己已於年初離婚，目前以單親媽媽身份照顧小朋友，同時宣佈會重新開始寫真事業。除咗於7月14日，佢42歲生日當日推出時隔十三年來嘅首本個人寫真集外，亦重新開始為雜誌拍攝寫真，展現出幾乎無被時間影響嘅身材外貌。

新寫真集名為《キセキ》，據「華彩なな」接受訪問時指，呢個名除咗有「奇蹟的42歲」嘅意思之外，亦有「軌跡」嘅意思。佢表示出到20年以來，經歷過結婚、生仔、離婚、成為單親媽媽，今次寫真集就係想展示咁多年嚟嘅經驗。佢亦表示寫真集令佢從麻煩不斷嘅婚姻中解脫，係佢回歸寫真拍攝嘅「歸宿」。

雖然上一段婚姻離婚收場，但佢表示未來有機會的話仍想再婚，更會參考其他藝人搵個fans做老公。所以，或者大家都有機會㗎！

IG：nanakasai