唔少男仔都對自己嘅身高唔太滿意，甚至有人為咗長高而決定進行手術。但你又唔好以為身高對女仔黎講唔重要喎。好似今晚要介紹呢位「竹本あいり」咁，身高148cm嘅佢就曾經因為想增高到175cm而用盡方法，最後仲整親自己。同時亦因為佢增高失敗，所以最後先會以偶像身份出道，而且最近開始拍攝寫真添！

現年21歲嘅竹本あいり，由3歲開始就於老家廣島學習芭蕾舞，一直到15歲為止。據佢回憶，當時每日要訓練5個小時，整個童年幾乎都係被芭蕾舞佔，而佢亦曾經於全國大賽中獲得前10嘅好成績。後來更因為要搵芭蕾舞嘅服裝時，無意中發現兒童模特兒嘅徵選，隨意報名之下成功入選添。

當時嘅佢一心想做個芭蕾舞者，但高中時打算去英國嘅芭蕾學院留學時就發現，國外嘅芭蕾舞者大多都有175cm以上，而身高僅得148cm嘅佢自覺於國外難以成功。於是佢就想盡辦法增高，又食鈣又打針，甚至利用器械拉長自己個人，可惜最終只係整親條腰。就喺呢個時候，有人問佢有冇興趣加入偶像團體「Devil ANTHEM」，於是佢就決定轉換跑道，加入日本藝能界。近日佢亦為《週刊Playboy》獻出自己嘅初水著，展現出嬌小但有料嘅身材。

Twitter：DANTHEM_AIRI