17歲大概係大部份人最青春、過得最開心嘅年紀，相信亦有唔少人希望自己能夠一直保持17歲。而今晚要介紹嘅呢位「奧仲麻琴」，雖然已經出道咗超過十年，但就一直「維持」喺17歲，大家又覺得佢呃唔呃到人呢？

奧仲麻琴15歲時就被經理人公司發掘，與其他9名女仔組成偶像組合PASSPO☆，並於2011年出道。同年佢就以「17歲，青春大爆發」做主題推出首本個人寫真而大獲好評，後來再於2013、2014年推出寫真集。2012年時佢更因為於《假面騎士Wizard》出演女主角「曆」而廣為人知。自此之後佢就自稱為「永遠的17歲」，就連「17歲生日會」都舉行過三次。

不過自此之後，佢就專心演員工作，冇再拍攝寫真。直到今年，佢先再次為《週刊Playboy》拍攝寫真，而依家佢已經係個28歲嘅成熟女人，亦能駕馭更誘人大膽嘅造型。講起「駕馭」，奧仲麻琴早前於個人YouTube中宣佈自己終於買車，而且係大受歡迎嘅Suzuki Jimny，唔知佢呢個汽車品味，又會唔會令大家對佢更有感呢？

IG：okunaka_makoto