社交媒體嘅興起，令一眾年輕人能夠以我哋呢班阿叔想像唔到嘅速度成為名人。就好似今晚要介紹嘅呢位「なえなの (naenano)」，你可能係因為佢早兩日出咗本寫真集先知道佢嘅存在，但其實佢係一名於各個平台上擁有超過500萬Followers嘅超強社交平台網紅！

現年21歲嘅「なえなの」最早於日本TikTok起家，咁大家都知TikTok啲片通常都冇咩實際內容，「なえなの」亦唔例外，但就因為佢實在太可愛而廣受網民歡迎，至今TikTok已經有超過350萬人Follower；2020年7月成立YouTube後，就算更新頗為疏落，但早前亦成功晉身「百萬YouTuber」行列，再加IG上嘅88.8萬，以及Twitter上近40萬Followers，加埋有近600萬名Fans。難怪2020年佢喺「Z総研」針對13-25歲男女舉行嘅「下半年流行度調查」中，能夠雄據TikTok網紅第一、Twitter網紅第二、Instagram網紅第三，其中TikTok網紅第一嘅位置更係保持到2021年下半年。

超強大嘅網絡人氣當然為「なえなの」帶來唔少工作機會，例如佢早前就出演戀愛真人Show《恋とオオカミには騙されない》，又曾於渡辺直美合作拍廣告。4月4日更推出個人首本寫真集，自稱人生從未著過比堅尼嘅佢為寫真集獻上自己嘅第一次，難怪正式推出前就已經要加印兩次啦！

圖片：naenano78 on Twitter、naenano0114 on IG