ABK48元老成員「柏木由紀」，早前因發現患上罕見疾病「脊髓空洞症」而停工接受手術，經過將近一個月休養後，佢就喺尋日30歲牛一大日子宣布復工，並發行全新寫真集《Experience》慶祝。

《Experience》係「柏木由紀」第3本個人寫真集，距離上部作品已經相隔9年有多，同時亦係佢踏入3字頭第一本寫真。顧名思義，今次寫真主題就係「經驗」，柏木表示今次將自己14年嚟偶像生涯所見所聞都塞晒入本書，更特登揀咗一張被AKB歌衫包圍嘅相做寫真集封底。不過預覽圖就得上面咁多張，等我帶大家再次重溫「柏木由紀」嘅靚相啦！

「柏木由紀」早於2006年參加AKB48第3期選拔成功入團，歷屆總選都一直擠身前十，可以話係在籍AKB48成員當中最有代表性嘅一位。雖然隨住SKE48嘅「松村香織」喺今年5月畢業，佢就成為咗全個「48集團」最老嘅成員，不過睇落就一啲都唔老，頂多叫做大姐姐，拍起寫真上嚟仲索過唔少後生妹妹添！