現年22歲日本女子團體「欅坂46」前任成員今泉佑唯，今日透過官網宣布與28歲人氣YouTuber Mahoto（ワタナベマホト）結婚，並表示懷有5個月身孕。今泉佑唯表示，「喺現今呢種特殊情況下因為私事打優大家非常抱歉，我向大家宣布我已經同男朋友Mahoto結婚，佢專注工作嘅態度非常吸引我，而且對我非常溫柔體貼。」又提到自己已經懷上身孕，預產期係6月，強調唔會退出演藝界，視乎產後健康狀況再決定未來去向。

據日媒報導，今泉佑唯同Mahoto從上年春天開始拍拖，同年二人曾確診肺炎，現已康復。唔知係咪患難見真情，二人感情迅速升溫拉埋天窗，升格做埋爸爸媽媽，消息震驚一眾粉絲。有網友刮出Mahoto黑歷史，指佢喺2019年曾經對同居女友施暴，事後一度被公司落「禁酒令」，雖然事情最後順利和解，但都令唔少網友擔心佢會重蹈覆轍。

今泉佑唯畢業單飛後開始向日劇發展，同時活躍寫真界，係一眾畢業生中曝光率最高，用可愛女友風格打動唔少粉絲。