黃子華喺《色情家庭》講過，要經營一份愛情同返一份Full Time工一樣，所以大家要辯論嘅唔係「中學生應否談戀愛」，而係「一個人應否有兩份工」。近日日本亦有人就用職場黎比喻愛情，話「秘撈」同「轉工」就係男女偷食嘅唔同，結果獲得大量網民讚好！

この前、先輩が「女性の浮気は転職活動、男性の浮気は副業」と言っていて、なんてわかりやすい例えなんだろうと思った。

— ユナ@美容皮膚科 (@YoonA_partydoll) December 28, 2020

發文嘅「ユナ@美容皮膚科」，睇個名都知佢係一個美容醫生，佢個Twitter本身都係分享緊啲類似資訊，再加少少生活日常咁。而喺上年12月尾，佢就突然發文指「記得聽前輩講過，女人偷食是轉職活動 (即係搵工轉)，男人偷食就係秘撈，呢個比喻實在太好」。

「想轉工」同「搵秘撈」嘅相同之處，在於大家都唔想冇咗份工 (至少唔想呢一刻冇咗)，但「搵工轉」嘅人只係騎牛搵馬，個心已經唔喺原本份工之上；而秘撈嘅人係想Keep住原本份工，但另外搵啲收入。而且無論邊個情況，如果比原本份工個老闆 (正印) 知道，都係會被人炒魷魚 (分手)。可以話係完美地將男女偷食嘅心態比喻出黎。

呢個咁貼切嘅比喻唔單止引起日本網民熱烈回應，個Post依家已經有超過16萬讚好，亦有唔少人基於呢個比喻做出更多演繹。例如「想轉工嘅人被人發現後炒咗可能都仲會開心，秘撈嘅人被人炒就只會剩返後悔」、「如果本身間公司唔係太差，又搵唔到令事業更好嘅工，都係做住先啦，等到被人炒先轉工」、「咁NTR就係Headhunt啦？」、「週圍食女、食仔嘅就係做Freelance」、「靠自己解決嘅算係自己老闆」等等。