早幾日介紹日本2020年寫真集銷量冠軍「田中美奈實」嘅時候，都講過喺日本做新聞主播，除咗要叻之外都仲要夠靚女，更難得嘅日本電視台Keep住都搵到啲咁叻咁靚嘅女仔出黎。好似呢位今年先成為主播嘅「佐久間みなみ」咁，佢個笑容真係甜死你呀！

圖片：sakuma_minami on Instagram

佐久間みなみ出生於日本名古屋，12歲到16歲時因為跟隨母親工作嘅關係而搬到大名鼎鼎嘅美國賓州 (賓夕凡尼亞州)生活，後來又返返日本就讀上智大學國際教養科，成績仲要好多拎咗三年獎學金。個樣生得極為甜美可愛嘅佢，大學三年級被選為「Miss Campus」嘅冠軍，亦有加入靜岡電視台做天氣主播，畢業之後就正式加入富士電視。你睇下佢啲相入面個笑容幾咁可愛！真係睇到人哋心情好好呀！

圖片：sakuma_minami on Instagram

身高156cm嘅佢亦玩過6年藝術體操，所以身體相當柔軟。而唔知點解佢就好鍾意自己一個去睇戲同唱K，而且非常鐘意睇「食播 (即係專門食嘢被人睇嘅節目)」。另外佢係唔鍾意食茜 (芫茜)、亦唔鍾意玩刺激嘅機動遊戲。