上次睇完歐陽娜娜篇文，大家係咪都好清楚究竟咩係「魯蛇(Loser)」呢？但既然MenClub以「Be a better man」做口號，冇理由淨係恥笑完你(順提一帶，我好公平架，我連自己都笑埋架）就咁算！所以文青決定教大家做一個「溫拿」！

溫拿扶人一把

只有希望同其他人一齊成功，先可以聚集有能力嘅人幫你；否則就只會將其他人越推越遠。

溫拿有勇於改變

羅文教落「知否世事常變，變幻原是永恆～～～～」但呢個世界總有啲人食古不化地認為可以一本通書睇到老，結果就會被時代巨輪碾過。

溫拿欣賞別人

準確啲，係要有識人之能。大學有做過Group Project都知「Band橋容易諗橋難」，與其指出人家有咩唔好，不如拎當中嘅可取之處黎用。如果指責只流於謾罵就更加係低手中嘅低手。

溫拿談想法

講人是非係好爽，但講完對件事通常都冇咩幫助。想成為「溫拿」，就要懂得提出想法令事情變得更好。

溫拿努力學習新事物

既然「變幻原是永恆」，要跟得上「變幻」就要不停學習。固步自封最後就會被淘汰。

溫拿懂得寬恕

成功人士心胸廣闊，唔會被怨恨遮蔽自己嘅眼睛。但計我話最重要嘅係個人唔記仇，日子都過得開心啲啦。

溫拿為失敗負責

作為一個領袖，最重要嘅唔係領功，而係認錯。如果將錯失指責於旁人身上，一來失民心；二來亦代表你拒絕審視自己的不足。

講真，呢啲嘢其實好老土，不過做唔做得到，又係另外一回事啦。