食昆蟲絕對唔係奇聞，唔少餐廳都會有昆蟲菜式畀你一嘗食蟲滋味，不過Chill到當零食咁邊行邊食，又真係另一種玩法！而日本熊本市就出現咗「世界第一部昆蟲零食自動販賣機」，畀你隨時口痕都可以買包蟲蟲零食過下口癮，販賣機入面所販賣嘅昆蟲零食類別有蟋蟀、毛蟲等等，仲有分不同口味，就連朱古力同抹茶口味嘅昆蟲零食都有！不過重點係睇你敢唔敢食啫！

話說呢部「世界第一部昆蟲零食自動販賣機」其實係一間氣球商店擺嘅自動販賣機，老闆友田敏之表示，未來地球可能仲會再進入冰河時期，到時人類嘅糧食可能會唔夠，亦都冇保障，而昆蟲有豐富嘅蛋白質，亦非常有營養，可以當作食物，所以希望人類未雨綢繆，為將來打算，嘗試習慣食蟲。而佢自己都話，自己以前其實係好討厭昆蟲，不過而家都可以食到昆蟲，相信大家都可以克服到對昆蟲嘅恐懼！

其他人係咪可以好似老闆一樣克服到將條蟲擺入口我就唔知，但出乎意料地，呢部自動販賣機嘅生意都唔錯，仲喺網上掀起熱潮，就算售價不算平（每一包昆蟲零食售價約600—1900日元）但每日都會賣出過百包，至於係咪真係買嚟食呢？有次日本媒體報導緊昆蟲零食自動販賣機嘅時候，正好遇到有人專門由名古屋跑嚟買昆蟲零食，記者問佢係咪會買嚟食時，對方就話︰「我唔會食，呢個係用嚟拎返公司做懲罰道具。」Well......似乎昆蟲零食自動販賣機上嘅「Can you eat？」字句真係看破人心，有幾多人真係會買嚟食呢？