「露股褲」呢個熱潮喺女裝時尚上就見得多，不過男人相對就少啲露Pat，可能大家都認為男人屁股唔係特別性感嘅一部分？所以就算係露，都係露手瓜露胸肌露腹肌，一係就直頭露條J出嚟威威佢，屁股？對男裝而言好似冇太大露出嚟嘅價值。但最近Twitter就有條不一樣的「露股褲」爆紅，皆因佢唔係女裝，而係一條男裝「露股褲」！重點係你想露少少又得，露多多又得，得咗！一齊研究下呢條「股惑」的褲先！01

話說有個日本網民喺Twitter上Share咗條來自西班牙男裝品牌PALOMO SPAIN嘅男裝褲，結果就被網民瘋傳。西班牙設計師Alejandro Gómez Palomo所創立嘅男裝品牌PALOMO SPAIN，喺設計上加入女裝元素，企圖突破男裝過去礙於性別上嘅侷限。可能就係因為呢個諗法，引致佢有「露股褲」呢個Idea，認為女人都可以露Pat，男人都一定得！於是一條前面冇問題，後面出晒事嘅男裝褲就此誕生……

可以睇到，呢條男裝褲正面好正常，但一轉身望見後面，就會睇到成排鈕扣，仲要呢啲鈕扣粒粒都啪得開，唔係裝飾咁簡單，你鍾意嘅話，可以淨係開少少，又或者開晒全部直接露股，一樣冇問題。不過網民就好疑惑，究竟呢個Function幾時用得著……？去廁所嘅時候？搽痔瘡藥嘅時候？定係……？巴打你又覺得條褲用嚟做咩最啱用呢？