《小王子》係全球銷量僅次於《聖經》嘅經典著作，篇幅簡短，但意義深遠，猶其係狐狸、玫瑰花、小王子同主角嘅對話，真係唔同階段睇，會有唔同嘅領受。《小王子》作者聖艾修伯里 (Saint-Exupéry)，亦都係一位好出色嘅機師，同Big Pilot錶都算有淵源，今次特別要講Big Pilot 系列入面嘅「Le Petit Prince」紅金年曆腕錶特別版。

46mm 18K紅金錶殼，藍色錶盤有呈放射狀嘅陽光飾紋，年曆顯示於12點位，3個並列視窗排成一個弧形，上面清晰顯示咗年、月、日3個資訊，但需要注意個年曆喺每年2月要以切換機制調較一次。

IWC 自家 52850 機芯具有兩個發條盒，提供到足足7日嘅動力儲存，仲驅動到年曆嘅三個視窗。錶盤左邊小秒盤，指針、數字刻度係白金同紅金輪廓，顯示功能有白色Super-LumiNova夜光塗層。

真正重要的東西 : 錶底蓋有一個小王子企響自己個星球上嘅紅金擺陀！大型藍寶石水晶底蓋，可以睇得好清楚，小星球化身成擺陀中心，圍繞軸線偏心旋轉，小王子前後擺動，令人諗起佢追逐日落嗰份純真，噴砂、拋光錶面使到整個設計優雅無比。