日本著名遊戲系列《人中之龍》最新作《人中之龍7外傳 英雄無名》即將於11月9日正式推出。而開發商SEGA日前亦宣佈，會與1873年創立、有150年歷史嘅日本釀酒廠「賀茂鶴酒造株式会社」合作，推出以遊戲主角桐生一馬為主題嘅「堂島之龍 大吟釀」以作宣傳。各位《人中之龍》Fans要留意啦。

《英雄無名》故事延續2016年推出嘅《人中之龍6 生命詩篇》，故事舞台同樣以廣島為主，亦係今次SEGA會搵黎位於廣島、歷史悠久嘅「賀茂鶴酒造株式会社」合作嘅原因。既然叫得做「堂島之龍 大吟釀」，就當然係以桐生一馬為主題，所以採用全黑色酒瓶，並印有水墨風嘅桐生一馬「應龍」紋身背影、《人中之龍》系列標誌以及大大個「堂島之龍」字樣。包裝盒上亦有「應龍」花紋。

而酒體本身就係用上廣島產大米配以賀茂山系嘅伏流井水釀製而成。官方指口感輕快，尾韻帶甜。無論冷飲、室溫飲或加熱飲都非常適合。

呢支「人中之龍 銘酒 大吟釀 堂島之龍」由即日起於日本「酒繋」網上商店，以及賀茂鶴酒造官方商店接受預訂，並預計與遊戲一樣於11月9日正式發售。售價為5,500Yen，即約HK$290左右。

資料來源：PRTIMES