Casio G-SHOC早年推出有八角錶圈嘅GA-2100系列，後來更推出「Full Metal」全鋼版嘅「GM-B2100」。由於功能強大、外貌靚仔而且神似Audemars Piguet (愛彼) 嘅「Royal Oak (皇家橡樹)」，所以被錶迷戲稱為「Casioak (農家橡樹)」。而「Casioak」系列近日就新增一員，就係黑面金錶「GM-B2100GD-9A」。

GM-B2100系列之前共有三隻色，分別為黑鋼 (GM-B2100BD-1A)、銀色不鏽鋼 (GM-B2100D-1A)以及玫瑰金色不鏽鋼 (GM-B2100GD-1A)。而新加入嘅「GM-B2100GD-9A」就用上金光閃閃嘅黃金色。八角錶圈正面及錶帶用上拉絲打磨、而錶圈側面以及按鈕位置等就用上鏡面打磨，令腕錶充滿層次感。縱然整個GM-B2100系列都用上黑色錶面，但GM-B2100GD-9A將錶面大部份文字以及兩支指針都換上金色，時標方面就加入少量金色作點綴，整體設計偏向「玫瑰金色鋼」，但就相對低調、優雅一點。

功能方面，除繼續採用指針數碼雙重時間顯示之外，G-SHOCK標示性嘅防震結構、200米防水、世界時間、計時碼錶、電子鬧鐘等一應俱全。當然亦唔少得TOUGH SOLAR太陽能充電，以及使用藍芽連接手機App設定手錶嘅Mobile Link功能。官方公佈建議零售價為HK$5,180，與同系列其他款式嘅建議零售價相約。但值得一提嘅係，目前市面上嘅黑鋼、不鏽鋼版大多以「三字頭」售價發售，大家可以參考一下。