日本威士忌近年因產量所限，買少見少之下就冇早年「一街都係」嘅盛況，取而代之嘅，就係更為罕有、珍貴嘅特別版、限量版。好似Suntory早前就推出「山崎55年」，建議零售價已經高達六萬美金，即係近五十萬港紙！

1960年代初，Suntory創辦人鳥井信治郎步入晚年，但仍親自監督山崎蒸餾所嘅原酒釀製，將原酒置於水楢桶之中。1964年，Suntory第二代首席調酒師佐治敬三接手，將原酒轉到白橡木桶之中陳釀，然後原酒經過昭和、平成、令和三個年號，到2020年由第三代調酒師鳥井信吾，與第五代首席調酒師福與伸二合作，將原酒調配成大家眼前呢支散發檀木和熟成水果香氣，甜中帶微苦與水楢木香，而且係有史以來年份最高嘅日本威士忌。

為咗配合其珍貴性 (同個價錢)，山崎55年採用水晶酒瓶，瓶身以噴砂刻上「山崎」及「55」等字樣，其中「55」字更加上金漆展現貴氣。瓶口嘅包裝紙乃係全手造嘅越前和紙，再配上京都傳統編繩工藝，支酒外面仲有個水楢木禮盒添。

其實山崎55年早於去年就已經推出，更曾於拍賣會上以HK$620萬成為史上最貴單瓶日本威士忌。依家香港都有得買啦，即係大家都有機會試到啦——如果你有錢又有面買到嘅話。