要數目前香港人最鍾意嘅酒店，Eaton HK應該會放到其他酒店車尾燈都見唔到。既然咁鍾意，當然就要多多支持，問題係我冇理中隔幾日就去Book間房自己同自己Staycation架？所以幫襯酒店入面嘅酒吧餐廳就係一個更可行嘅方法。而位於Eaton HK LG層嘅酒吧Flower Years黎緊就會搞個「好Local啤酒節」，畀大家一個好理去幫襯佢！

半露天酒吧Flower Years本來就已經非常支持本土品牌，所以場內一直都有提供如「Gweilo鬼佬」、「Moonzen門神」、「麥子」、「Steven Brews」等本地手工啤。而由11月開始嘅「好Local啤酒節」，就係與不同本地手工啤品牌合作舉行。以11月2日開始嘅第一場為例，就會與「Gweilo鬼佬」合作，除咗為Gweilo鬼佬嘅皇牌手工啤提供7折優惠，亦會提供Gweilo鬼佬嘅期間限定生啤「Hazy IPA」及「Pale Ale」。

而於11月5日及19日下午6點至8點，Flower Years亦會與Gweilo鬼佬舉行免費啤酒試飲活動，仲搵咗本地街頭音樂家表演，令大家可以於半露天環境下享受秋風，同時欣賞本土手工啤及音樂。