Zenith嘅DEFT21系列，以精準到百份一秒嘅計時功能聞名，由2017年推出到依家，雖然出過好多唔同款，但功能都維持一致，所以要揀呢，基本上就係揀個樣。而如果你熱愛音樂，品牌與著名DJ Carl Cox推出嘅聯乘之作或者就會啱你心水。

DEFY 21 Carl Cox早前於「LVMH Watch Week Dubai」現身，最近正式抵港。外形上，黑色碳纖維錶圈上有潑墨狀嘅夜光塗料，黑膠底紅色Cordura錶帶嘅車線亦有夜光效果。錶盤就呈鑲空設計，特別係九點鐘嘅小錶盤刻意設計成黑膠唱片嘅樣，以回應Carl Cox嘅音樂特性。

你可能會話「個黑膠錶盤咁細睇唔清喎」！放心，因為隨錶附送Carl Cox簽名嘅黑膠唱片一隻，個樣就同個小錶盤一樣，仲真係收錄咗Carl Cox製作嘅音樂。甚至送埋個PIONEER DJ HDJ-X10專業級耳罩式耳機過你慢慢聽添。

目前Zenith於K11 Musea三寶鐘錶舉辦以電子音樂及科技舞曲為主題限定展覽，放咗一套DJ專用的打碟混音器材，配合Disco燈光及高科技螢幕顯示台階，值得一睇。