睇開MenClub嘅讀者應該心水清，夜晚十一點半呢段時間都會由Mean娜放出各種重口味或關於性愛嘅文章，話晒深夜時段，係講呢啲咸濕嘢多架喇。不過今晚我想特別少少，同大家講比較沉重嘅話題——「自殺」。

可能大部分讀者都希望喺MenClub放鬆一下，睇下女睇下Kai嘢笑下就算，不過有見於近期接二連三發生多宗學童自殺個案，作為傳媒，一個新聞工作者，冒住呢篇會呃唔到Like嘅風險，都想借用大家少少時間，關心學童自殺議題。

Mean娜之前喺網上見到有個叫《不可理喻的世界》嘅網路漫畫，講嘅都係日常成日遇到、非常簡單又普通嘅事，但偏偏呢啲看似正常嘅生活，卻又最唔正常，令人喘不過氣。

雖然《不可理喻的世界》只有短短數格，但卻道出人生中好多不可理喻嘅事情。故事開首係一個女學生向喜歡嘅男生表白，但個男仔就同佢講︰「哎呀～對唔住，我鍾意短頭髮嘅女仔。」於是女學生就剪掉一頭長長嘅秀髮，迎合男生喜歡嘅口味，再次表白，但個男仔就話︰「好多謝你嘅心意，但你唔係我鍾意嘅類型。」但原來雙重標準喺呢個世界上周圍都係，女主角慢慢發覺人生充斥著難以適從嘅真相。

無論你點做，啲人都可以話你錯，就算佢哋講嘅說話如何矛盾、如何自打嘴巴，道理都不在自己身上。後來女主角睇唔透呢個世界，變得愈來愈陰沉，成為被欺凌嘅對象……

「你快啲去死啦！」

唔少日本網民睇完篇漫畫都表示好有共鳴，就用父母同孩子為例，父母可能成日都將自己嘅孩子同其他小朋友比較，見人哋小朋友成績好、品行好，就叫自己個仔︰「你學下人啦！」但當小朋友見到同學有新玩具，想扭下計叫父母買嘅時候，父母又會一句得埋嚟︰「唔好同人比！人哋係人哋，我哋還我哋！」

作為大人，唔難明白父母嘅心思，但作為小朋友，係咪有足夠理解能力明白父母想點？就連大人對一時一樣嘅說話都感到困窘，咁以大人為榜樣，咩都聽大人指令去做嘅小朋友，又應該點做？身教唔係得把口，放低「大人」嘅身份，承認自己嘅不足，多啲聆聽孩子嘅心底話，如果連父母都唔清楚自己孩子係點，又點能夠讓孩子好好「做自己」？失去自我嘅人，既然世上唔需要「自己」，只需要一個又乖讀書又叻嘅軀殼，小朋友又點有希望好好為自己活下去。