一般黎講，所謂嘅「性感」係同露出幾多「肉色部份」成正比，露得越多就越性感，咩都露哂就更加好難忍。不過近日日本寫真女星「豊島心桜」就完成咗一個創舉：佢於社交媒體上Post出一張完全唔見「肉色」，只係見到佢個肺同啲骨嘅X光照，但一樣令人覺得好性感！

現年22歲嘅「豊島心桜」早於初中二年級就去參加日本少女時尚雜誌《Seventeen》嘅模特兒徵選，雖然最終未能奪冠，但就吸到經理人公司搵上門簽約，自此踏入日本演藝界。出道初期佢以主持、劇集、廣告等工作為主，直到2023年於《週刊Playboy》寫真出道，大家先知佢除咗可愛包包臉之外，仲有非常豐滿嘅上圍。結果唔單止寫真大賣，《週Play》仲於短短一個月內邀請佢再拍封面寫真。從此佢就成為日本寫真界不可多得嘅重要人材。

而日前「豊島心桜」就於個人X上分享咗自己嘅肺部X光照，並留言表示「我個肺好乾淨」。明明只係一張見到個肺、肋骨同少少身形輪廓嘅X光照，但就因為顯示出佢渾圓豐滿嘅天然胸部線條而引起網民熱議，到撰文之時已經吸引到4100萬次觀看、近6萬個讚好。唔少人都留言恭喜佢身體健康，亦有人吐糟「X光照都可以性感係咩事？」。或者咁就證明其實「肉色部份」唔係「性感」嘅關鍵，大家嘅幻想先係啦！

IG：cocorotoyoshima