大家上網睇人哋啲感情婚姻問題，久唔久就會見到有人（通常係女方啦）投訴另一半寧願「食自己」都唔肯做愛，似乎暗示「自慰」與「做愛」係替代品，男人自慰滿足啦就唔會做愛。但近日一個新研究就得出一個有趣結果：男人自慰嘅頻率由19歲開始到50歲其實都唔會變，亦唔會受佢哋同伴侶嘅做愛頻率影響。簡單啲黎講就係：男人點都會打飛機！

為咗了解「自慰頻率」與「和伴侶做愛頻率」之間嘅關係，一群挪威研究者就利用當地一個大型、長期追蹤嘅研究數據庫，去分析當地男女於不同年齡階段嘅自慰、做愛頻率，以及身份轉變（例如拍拖、結婚）等因素對兩者嘅影響。

結果發現，平均而言男性嘅自慰頻率唔出奇地比起女性要高。而且女性嘅自慰嘅頻仍係會隨年齡而變化，從19歲開始增長，去到31歲左右到達頂點，然後就隨年齡增長而下降。而男性嘅自慰頻率就幾乎毫無變化，從19歲到50歲都維持於同一水平。

研究亦發現，「做愛頻率」對「自慰頻率」基本上毫無影響。不論男女，不論佢哋做愛密唔密，佢哋嘅自慰頻率都係維持一致。換言之對於呢班受訪者黎講，有無愛可以做、做得有幾密都好，佢哋都係會自慰。再換言之就即係「自慰」係一個獨立於「做愛」嘅行為，並非如過去某啲理論所講，係「做愛」嘅代替品或補充品。

咁睇完呢篇嘢對你有咩得著？就係你知道「自慰」係一個獨立行為，無話你想打飛機就代表同另一半做得唔多、唔夠密。該打嘅時間一樣要打！

資料來源：Masturbation Trajectories from Late Adolescence into Mid-Adulthood: A Population-Based Longitudinal Study