大部份嘅感情狀態，都跟隨住「單身獨居、拍拖獨居、拍拖同居，再到結婚同居」呢幾個步驟，好似跟足哂呢幾個步驟——特別係到達「結婚同居」——就一定係最開心，最滿足。不過近來一個歐洲研究就發現，雖然進入一段穩定持久嘅關係的確會能人生滿足度提升，但大部份「好處」都係出現於開始關係，亦即「拍拖獨居」呢個階段，換言之結唔結婚似乎對你嘅人生滿足度無咩影響。

圖片：Pixabay

話說一群來自德、英兩地嘅心理學研究者，為咗了解感情各個階段與人生滿足度之間嘅關聯，於是就分別利用兩地嘅大型跨年研究，搵出過千名之前無結過婚、無小朋友，而且於研究期間經歷單身、同居及結婚嘅樣本，並分析佢哋於不同階段嘅人生滿足度。研究結果顯示，與單身時期相比，樣本嘅人生滿足度於進入同居首年達到高峰，同居後兩年嘅滿足度雖然有回落，但仍然比單身時要高。

為咗進一步了解人生滿足度點解會增加，研究者進一步分析嗰啲於同居前就已經拍咗拖一年（但分開住）嘅人。結果發現佢哋嘅滿足度提升，大部份都出現於拍拖嗰一年，同居後雖然銀維持高位，但就無進一步增加。換言之，處於一段愛情關係中，本身就已經可以提高人生滿足度，同唔同居其實無咩影響。

圖片：Pixabay

研究再進一步分析，發現「結婚」對於人生滿足度嘅影響非常有限，無論係由「拍拖獨居」直接跳到「結婚同居」，定係於「拍拖同居」後短時間內變成「結婚同居」，都唔會令人生滿足度進一步提升（或下降）。換言之「結婚」呢個動作與人生滿足度幾乎無關。另外大家仲記得上面提到人生滿足度會於同居後稍為回落嗎？研究嘅另一個有趣發現，在於收入較高嘅人嘅回落幅度會比收入低嘅人少，某程度上亦證明「貧賤夫妻百事哀」係有啲道理嘅。

資料來源：Mapping Life Satisfaction Over the First Years of Cohabitation Among Former Singles Living Alone in UK and Germany