早年有日本報導曾經分析過，指假若將交友App上嘅男女分為ABCD級，咁無論係A、B定C嘅女性都會以A級男為目標，而又由於交友App上男多過女，所以好多所有A級男都會有配對，剩返嘅B、C級男就因為無人揀而成為被遺棄嘅一群。如果咁睇，似乎交友App上嘅女性有「好高騖遠」嘅傾向。不過近日一個外國調查就發現，其實男性可能先係「好高騖遠」嘅人，所以呢家嘢好可能係視乎文化而定。

話說過去嘅研究都顯示不論係已婚夫婦、約會情侶定係網上交友，大家都似乎偏好與自己有相似點嘅人。但由於相關研究大多於美國或者西歐嘅環境中進行，所以一群歐洲學者就打算於中歐地區測試下呢個模式準唔準確。佢哋分析咗來自捷克布拉格以及布爾諾（Brno）兩個地區，共近3,000名交友App用家，將佢哋按獲得嘅右滑數（交友App上用家將對象向右滑是為願意配對）分級，並分析每個用家向邊個右滑，又得到邊啲用家嘅右滑。

結果就發現，捷克嘅男性更傾於向等級高於自己嘅女性右滑，反之女性嘅右滑對象就係與自己相似嘅人，換言之捷克嘅男性先係「好高騖遠」嗰班。更重要嘅係，研究發現成功配對嘅男女，大多都係擁有相近嘅受歡迎程度。亦即係話即使男性嘅目標係比自己更受歡迎嘅女性，但最終能夠成功配對嘅都係同自己差唔多嘅人。

研究總結指出，雖然結果的確顯示「相似嘅人更容易配對」，但呢個結果係來自男性嘅好高騖遠被拒絕，而非主動尋求另一半嘅相似性。同時佢哋亦指出捷克嘅交友App「市場」係由女性做主導，即係男性想要啲咩唔重要，女性對你有興趣先能夠成功配對。

資料來源：It takes two to tango: A directed two-mode network approach to desirability on a mobile dating app