對大部份男士而言，睇AV係一個非常合理而常見嘅行為，哪怕係有拖拍甚至結咗婚都會保持呢個嗜好或習慣。而過去有唔少研究都指出睇AV會減少關係中嘅親密度，但另一邊廂又有研究指出睇AV可以增強伴侶於性方面嘅連結又或提升欲望，咁究竟睇AV係好定唔好嘅呢？一個新研究就話其實係視乎你睇AV嘅目的。

圖片：ImageFX

一個加拿大最新相關研究搵黎327組大多為異性、平均年齡31歲嘅伴侶，並透過日記紀錄追蹤佢哋於35日內分別觀看AV嘅次數、動機，以及與伴侶之間嘅互動。研究嘅目的主要係觀察不同觀看AV嘅動機會點樣影響伴侶之間嘅正面或負面行為。

結果就發現，如果受訪者係因為想釋放壓力、又或壓抑負面情緒而觀看AV，佢哋於同一日對伴侶亦作出更少正面行為（例如聆聽對方，作出體貼行為等）；相反如果受訪者純粹為咗快感，佢哋於同一日就會對伴侶作出更少負面行為（如批評、發脾氣等）；如果受訪者係同伴侶一齊睇AV的話，甚至會做出更多正面行為。換言之不同觀看AV嘅動機，與伴侶之間嘅互動有住不同嘅關連，所以唔可以一刀切話「睇AV對後關係就係好/壞」。

圖片：ImageFX

研究團隊指出結果其實符合所謂嘅「性動機接近/逃避理論」。該理論指出性行為背後可以有「接近」或「逃避」兩種動機，前者包括追求快感、親密感又或為滿足好奇心，而且通常都會為關係帶來更好嘅結果；而後者就包括減輕壓力、分散注意、避免與伴侶爭執等，通常會為關係帶來負面結果。而由於睇AV本身都係一種「性行為」，所以「接近」動機與伴侶之間更正面嘅互動有關連，而「逃避」動機則反之。

值得一提嘅係，研究亦發現無論係因為「接近」定「逃避」動機，只要唔係同伴侶一齊睇AV的話，伴侶都會減少正面嘅互動行為。另一方面，如果係男性係為咗快感而睇AV，其女性伴侶就會減少正面互動；反之如果係女性因為與伴侶相關嘅原因而睇AV，咁佢嘅另一伴就會增加正面互動。

資料來源：Are pornography use motivations related to behaviors toward the romantic partner? A dyadic daily diary study