一個最新研究發現，曾經為錢出賣身體嘅「性工作者」會更傾向擁有「肌肉上癮（muscle dysmorphia）」嘅症狀，具體而言即係會竭力追求自己練出大肌肉，甚至去到為咗鍛練而影響其他生活嘅程度。研究者指出背後原因，好可能係與同被物化者會傾向物化自己，繼而努力迎合社會理想體型有關。

來自加拿大多倫多大學社會工作學系嘅研究員Kyle T. Ganson及其團隊，早前公佈咗一個有關性工作者與肌肉上癮症狀之間關連嘅研究。研究將「性工作者」定義為「曾收錢進行口交、性交或肛交的人」，再招募912名年齡屆乎18至30歲嘅加拿大年輕人，詢問佢哋曾否進行過性工作，以及有否出現「肌肉上癮」症狀。

結果發展，912名受訪者中有4%（即約36人）屬於「性工作者」，而呢班人明顯更傾向出現「肌肉上癮」嘅症狀，特別係會竭力追求增加自身肌肉密度（即係將肌肉練大舊）以及為咗練肌肉而影響其他日常生活（為咗做Gym而放棄社交或工作機會等）。但要留意嘅係，研究同時發現呢班人並非不滿意自己嘅身材線條，換言之佢哋練大隻似乎唔係為咗「靚」，而係有功能性或心理上嘅推動力。

研究團隊對於上述結果提出幾個可能嘅解釋。首先佢哋推測，「練大隻練到影響生活」好可能係經歷性工作後而對壓力及社會污名化嘅應對措施，簡單黎講即係害怕被批評，所以努力提升自身型像，同時以此為理由逃避「有可能被批評」嘅社交場合。另一種解釋就針對「練大唔練靚」嘅特徵，指出「性工作者」可能係覺得需要保護自己，又或為咗迎合「客戶」喜好而鍛鍊。

Ganson指出，過去有唔少研究都指出，人被物化、特別係性方面嘅物化後，會更傾向物化自己並對自身形象產生不滿，繼而推動佢哋改變自身形象以迎合所謂嘅「社會理想」（例如「瘦」、「白」，又或此研究嘅例子「大隻」）。所以今次嘅研究結果對佢黎講並不出奇。

最後亦提醒大家，「性工作者會練大肌肉」，唔代表「練大肌肉嘅人就係性工作者」㗎下。

資料來源：Involvement in sex work is associated with muscle dysmorphia symptomatology among a sample of Canadian adolescents and young adults