交友App呢家嘢相信大家都唔會陌生，甚至非常熱衷。但一般而言，大家都認為交友App上嘅關係只適合「玩吓」，如果有人同你講佢男或女朋友係於交友App上認識嘅，你或者會立即用批判性嘅眼光去審視對方呢段關係。不過，據外國一個新研究顯示，其實於交友App上認識嘅情侶，其感情狀態與用傳統方法認識嘅情侶無咩分別。簡單黎講就即係，交友App上其實都有機會識到真心人！

美國德州Baylor大學人類科學助理教授Mickey Langlais早前公佈佢嘅研究成果。佢先搵黎233名年滿18歲嘅大學生，當中有120名目前拍緊拖，而且有34人係從交友App上認識目前嘅另一半；另外所有受訪者當中亦29人嘅前度男友/女友係於交友App上認識。研究中呢233名受訪者要按佢哋目前、或對上一次嘅感情，回答一份有關「感情質素」（即係滿意度、親密度又或者信任等）嘅問卷，隨後再將答案分成「交友App識另一半組」以及「傳統方法識另一半組」作比對，睇下兩組之間嘅感情質素有冇差別。

結果就發現，無論講緊嘅係現任定前度，「交友App組」及「傳統方法組」嘅感情狀態都無統計學上嘅差異。換言之喺交友App上開始嘅關係，其實就同普通關係一樣。Mickey Langlais指出，對於交友App嘅污名化減少，以及使用交友App變得越黎越尋常，可能係導致上述結果嘅原因。換言之交友App已經融入一般感情關係之中，未必再係大家心目中嘅「約炮」App。

資料來源：Dating Applications versus Meeting Face-to-Face: What Is Better for Romantic Relationship Quality?