2025年都黎緊頭，依家仲同人講揀另一半要「竹門對竹門、木門對木門」似乎非常老套。但事實係，大家潛意識中一直都做緊類似嘅行為，不過睇嘅唔係家世，而係外表。近日有一個新研究就再次證實人類擇偶時嘅「選型交配」模式，亦即大家於選擇另一半時，其實係會偏向選擇外表水平同自己差唔多嘅人。

所謂「選型交配」，其實係指「選擇和自己相近的配偶行進行繁殖」；而當中嘅「相近」可以有多種不同維度，例如體型、膚色、年齡等等，而外表當然亦係其中一個維度。早於1988年時就已經有大型調查發現，自行評定嘅外貌吸引度，與第三者評定嘅外貌吸引度有顯著關聯——即係大家其實能夠「中肯」地評價自己有幾靚仔或靚女——同時伴侶之間嘅外貌吸引度又有明顯相似之處。

而近日有學者利用更先進嘅統計學方法重新審視上述數據。結果再次證實不論男女，其實都可以中肯地評定自己嘅外表吸引度（即係自我評定與他人評定係差唔多嘅）。同時伴侶嘅外表吸引度，不論係自己評自己、伴侶之間評對方、又或第三者對伴侶二人嘅外表評分都係接近嘅。換言之大家都傾向搵到個同自己差唔多靚仔或靚女嘅伴侶。

更有趣嘅係，新研究發現一對伴侶一齊嘅時間越長，佢哋自評嘅外貌吸引度，與第三者評佢哋嘅外貌吸引度之間嘅關聯就越強烈（亦即自己對自己嘅評分、與他人對佢哋嘅評分越接近）。咁可能係因為處於長久關係嘅伴侶，會因應外界——包括另一半——嘅意見重新審視自己嘅評分；同時亦可能代表外貌評分越接近嘅伴侶，就越有機會長時間一齊（評分冇咁接近嘅伴侶分咗手，就會只剩返評分接近嘅人），亦即所謂嘅「竹門對竹門、木門對木門」。

資料來源：Dyadic secondary meta-analysis: Attractiveness in mixed-sex couples