做愛呢家嘢，有人鍾意溫柔，有人鍾意激情。而近日一個澳洲大型研究就發現，當地年輕人不論男女，竟然都鍾意於性愛時「勒頸（Strangle）」。而有專家就警告勒頸嘅風險極高，只需10秒就可以令對方不省人事，嚴重者更會致命。

話說澳洲墨爾本大學及昆士蘭大學早前公佈咗個共同研究，指澳洲有近半數年輕人都會自願性地於性愛過程中「勒頸」或「被勒」。研究搵黎超過4,700名年齡屆乎18至35歲嘅澳洲年輕人，結果發現當中57%有曾經「被勒」至少一次、51%有「勒人」至少一次。當中大部份人都係於19至21歲呢個階段首次「被勒」（31%）或「勒人」（30%），目前每人平均被3個伴侶勒過5次。

當中男性嘅「被勒/勒人」比例大約為4:6，而女性就係反過來嘅6:4，顯示女性被勒嘅機會較高。另一邊廂，跨性別及多元性別族群嘅「被勒/勒人」比例就係78%：74%，換言之跨性別及多元性別族群基本上係「互勒」。

是次研究並無探討澳洲年輕人於性愛時「被勒/勒人」嘅原因，但研究團隊就警告「勒頸」係一個非常高危嘅動作，即使雙方自願、又冇表面傷痕，都唔代被勒一方沒有受傷。佢哋指出勒頸10秒就已經可以令人不省人事、17秒就可以令腦部缺氧、30秒就會令被勒嘅人失禁，150秒就已經致死。

另外佢哋亦提到，於性愛前定立「安全詞」（即某一方講出呢個詞，對方就要立即停下所有動作）並非必定有效，因為被勒一方可能失去說話能力。

資料來源：The University of Melbourne