所以「食色，性也」，作為人類最原始慾望之一，自人類就發展出文明以黎，「性交易」就處於一個大家都知存在，但又不願多談嘅陰音角落之中。進入現代化社會之後，唔少國家都以保障人權、人身安危等原因而立法規管或禁止性交易，但近日一個研究就發現，上世紀90年代瑞典將「嫖妓」刑事化後，當地強暴案件數目竟然暴增一倍，顯示不完整嘅法例及規管，可能會對社會造成更大傷害。

為咗知道「嫖妓刑事化」嘅成效，來自西班牙Comillas Pontifical大學經濟學系嘅助理教授Riccardo Ciacci選擇以瑞典作為研究案例。瑞典於1999年立法將嫖妓刑事化，較為特別之處係法例針對嘅係嫖客，而非提供服務嘅性工者，其原意係希望減少對性交易嘅市場需求，從而減少性交易帶來嘅社會禍害。

但Ciacci分析瑞典官方公佈，1997至2014年間犯罪率報告中嘅強暴案事件數，再透過統計學方法（例如以該時段嘅抵瑞航班數目以推斷「性旅遊」比率）排除其他有可能影響到事件數嘅變量後，發現嫖妓刑事化後瑞典當地嘅強暴案比率上升咗44-62%。同時，Ciacci並無發現任何證據表示當地性服務嘅供應減少，換言之當地立法嫖妓刑事化後，的確阻嚇到部份人唔再嫖妓，但當中某啲人就選擇強暴作為「替代行為」。

圖片：Wikicommon

Ciacci強調今次研究結果係證明「嫖妓刑事化」及「強暴案上升」之間存在因果關係。而對於結果嘅解讀，佢就認為可以有兩種。第一就係如果冇「嫖妓刑事化」法例，咁強暴案就唔會上升，所以根本唔應該有類似法例；另一個角度則視嫖妓為「付費強暴」，所以嫖妓就肯定要禁架啦，但立法時應該要考慮到「替化行為」，所以同時應有新法例或措施防範強暴案發生。

資料來源：Banning the purchase of sex increases cases of rape: evidence from Sweden