下體大小素來都係男性之間鍾意吹噓、或者感到心虛嘅話題，而「究竟幾大幾粗先夠用」亦係兩性研究恆常嘅主題之一。最近一個英國研究就採用咗一個新方法嘗試去了解女性對於男性下體大小長短嘅偏好：去研究女性向性玩具嘅銷售數字。

來自英國Kent大學人類及社會科學院嘅Sarah Johns及Nerys Bushnell，早前於科學期刊發佈咗一個關於女性向性玩具嘅研究。佢哋分析咗英國最大網上成人玩具銷售商「Lovehoney」網頁上總共265款「陽具狀」性玩具（即係「假9」），並透過整理產品大小、特徵、用家評價及銷售數字等，試圖搵出女性對於此類性玩具嘅偏好。

結果發現，於最受女性歡迎嘅五款性玩具中，平均圓週長僅為4.85英寸，即約12.3cm。雖然比起男性下體勃起後平均週長4.59英寸（約11.65cm）稍粗，但仍屬於「平均粗度」之中。研究甚至發現性玩具嘅圓週長與受歡迎程度係呈輕微負關係，換言之女性其實係偏好較幼嘅性玩具。

事實上「圓週長」亦係今次研究中唯二搵到同受歡迎程度有（統計學上）顯著相關嘅變數。例如長度咁，雖然研究中所有性玩具嘅「平均可插入長度」高達7.07英寸（約17.9cm），比起現實中男性嘅平均數字高出甚多，但數據上就搵唔到長度與受歡迎程度有任何關係。同樣地，膚色、有冇陰囊、有冇龜頭，以及識唔識震等變數，亦同玩具嘅受歡迎程度無關。而另一個有關嘅變數，就係玩具上有冇造出血管。

研究結論指出，女性似乎偏好粗度平均，而且「外表冇咁似實物」（除咗有血管）嘅陽具形狀性玩具。背後嘅原因，或者係因為害怕選擇大小、造型太過誇張嘅性玩具會令另一半感到不快，同時亦避免污名化自己（揀個又長又粗又真嘅性玩具好似自己好下流）。另外，最受歡迎嘅五款性玩具平均週長只為4.85英寸，亦與過往關於女性對男伴下體大小滿意度嘅研究相符，簡單黎講即係女性並不偏好特別粗壯嘅男性下體，比平均稍為粗小小已經非常足夠。

資料來源：What Drives Sex Toy Popularity? A Morphological Examination of Vaginally-Insertable Products Sold by the World’s Largest Sexual Wellness Company