相信大家對「包養」或所謂嘅「Sugar Daddy」並不陌生，同時大部份人都會認為「包養」其實就係一種「明買明賣」嘅交易：男方畀錢買關係，女方收錢賣身體。但近日一個研究就發現，其實包養雙方都會於關係尋找某程度的親密性及陪伴感，換言之雖然講金，但佢哋其實都講心架。

卻說加拿大New Burnswick大學心理學系嘅Kate B. Metcalfe等人早前進行咗個關於「包養關係」嘅研究，搵黎共77名目前處於包養關係中嘅男女（31個Sugar Daddy或Mommy，平均年齡48.15歲；45個有男有女嘅Sugar Baby，平均年齡28.76歲），並透過訪問得知佢哋嘅包養或被包養行為。

動機方面，Sugar Baby們「下海」嘅主要目的當然係為錢；而「Sugar父母」們則主要係為咗尋求陪伴感，又或「與於傳統約會市場中超出自己水平的女性建立親密關係」嘅優越感。但研究團體亦指出，雖然絕大部份包養關係都係圍繞「錢」同「性」而生，但「性」本身就已經包含某程度上親密感及情緒連結。同一時間，不論Sugar Baby或「Sugar父母」其實都渴望有「睡房外的約會、浪漫」元素，證明即使係包養關係之中，「性」同「愛」都係冇辦法完全分開。

另外，研究亦發現雙方嘅關係權力並非單單「畀錢就係老細」咁簡單，甚至「收錢做嘢」嘅Sugar Baby會於關係佔主導地位。研究指好一部份受訪者，當中包括部份「Sugar父母」們都認為關係嘅主導權落於Baby們身上。箇中原因為Baby們嘅年輕貌美令佢哋感到被需要，同時亦覺得自己應該被需要，於是「議價」能力大幅提升。另一邊廂，部份Daddy們亦因為不肯定Baby展現嘅吸引力係真實定扮出黎嘅，而表露出「令人驚訝嘅脆弱」。

資料來源：“I Was Worshiped and in Control”: Sugar Arrangements Involving Transactional Sex from the Perspective of Both Sugar Babies and Sugar Benefactors