講起日本「牛郎」，大家一定會諗起年薪3億Yen嘅「羅蘭」。不過近年就有另有一名牛郎「天使ニア」橫空出世，去年更創下年收2億Yen（約HK$1000萬）嘅超高收入。但高收入都唔係「天使ニア」最特別嘅地方，事關佢其實係個女仔黎！

係，你冇睇錯我冇打錯，「天使ニア」係目前已知首位公開女性身份嘅「牛郎」。據佢去年4月接受訪問時透露，佢嘅個人性別認同係女，而且鍾意女仔，同時又鍾意作「無性別」打扮。日本將此類人士稱為「FtM」（Female to Male）又或「オナベ」，即係香港俗稱嘅「TB」。「天使ニア」指自己於中學時期就知道自己嘅性向，但就一直唔敢同父母坦白。到大學時期佢去咗間男裝咖啡店打工，為咗提高營業額仲同同事創立咗個FtM地下偶像團體，結果頗受歡迎，佢亦借機邀請媽媽入場觀看，先真係向父母坦白。

但後來因為遇上疫情，唔少舊同事都另覓高就，「天使ニア」亦一度入咗電視台打工。但電視台工作時間長、人工低、又好似冇咩意義，所以佢就決定自己開男裝咖啡店，仲好快開埋分店，隨後更產生想成為牛郎嘅想法。剛好以前做偶像時嘅經理人去咗牛郎店打工，於是「天使ニア」就向該公司毛遂自薦，仲開宗名義講到明「我係女仔，但我想做牛郎」，點知對方又真係畀佢見工仲請埋佢，於是就做到依家啦。

「天使ニア」指出，其實日本牛郎界中一直都有「女牛郎」嘅存在，但絕大多數都會隱藏自己嘅真實性別，甚至曾經出現過「女牛郎」愛上「牛郎」嘅事件。而佢一開始其實都想隱藏性別，只係因為把聲太易被認出，所以根本就呃唔到人。及後佢更曾於牛郎店嘅YouTube影片，因為差啲被掉落水，情急之下講出「我黎緊M！」而正式公開女性身份。

但公開性別後，指名佢嘅客人越黎越多，更曾創下一個月收入5600萬Yen（約HK$300萬）、去年年收2億Yen（約HK$1000萬）嘅好成績。

不過佢亦提到，自己唔會長期做牛郎，亦唔打算做牛郎店管理層，最多再做兩年就會轉工。所以目前佢正努力地為下一個目標儲錢。

資料來源：日刊SPA!