兩性間嘅互相吸引行為背後，往往有生理、心理、社會等各種千絲萬縷嘅複雜關係，而近日一個美國研就發現，原來本身傾向搵短期關係，而且自覺吸引力高嘅女性，會更傾向被擁有陽剛樣貌嘅男性所吸引。但研究同時發現1，呢班女性其實已經算係唔太「睇樣」嘅女性！

來自美國德州A&M國際大學心理及傳播系嘅Ray Garza，早前曾經與來自奧克拉荷馬大學進化研究院嘅Jennifer Byrd-Craven聯手進行過一個，以眼球追蹤技術分析女性觀察男性樣貌及身材行為嘅研究。而為咗進一步分析女性觀察行為變化嘅背後原因，佢哋早前就進行咗一個新研究。

兩位研究員先搵黎72位異性戀、無食緊任何賀爾蒙避孕藥、而且年齡介乎18-40歲嘅美國普通女子。並利用兩組問卷先評定受訪者對「短期、隨便關係」嘅傾向，以及對自身吸引力嘅評分。隨後再要求受訪者觀看一系列一組兩張嘅男性大頭照並作出評分，而兩張大頭照就分別係同一名男性嘅樣貌，但利用P圖技術令其面部特徵陽剛或陰柔。團隊同時利用眼球追蹤技術，觀察女性嘅眼球動向，以得出佢哋嘅注意力分佈。

結果就發現，本身傾向搵短期關係，以及自覺吸引力高嘅女性，會花更多時間觀看較為陽剛嘅男性大頭照 (對比起陰柔外貌)，亦即係話呢類女性會傾向被陽剛男士所吸引。呢個結果亦與早前嘅其他研究吻合。例如有研究發現自認為吸引嘅女性，會被更陽剛嘅男士身型所吸引。

但有趣嘅係，縱然自認吸引嘅女性會花更多時間觀察陽剛男性嘅外貌，但佢哋花喺觀察男性樣貌嘅整體時間，要比自認冇咁吸引嘅女性少得多。研究團隊指，呢個結果表示自認吸引嘅女性，其實冇放太多「認知資源」喺選擇另一半上。反過來說就即係，自認冇咁吸引嘅女仔，反而比較揀擇。

資料來源：Women’s Mating Strategies and Mate Value Are Associated with Viewing Time to Facial Masculinity