AV呢家嘢，所有男人都有睇，而且肯定睇唔少。但睇咗咁多年嘅AV嘅你，又有冇留意過作品中除咗女優、男優以外嘅演員？近日入行15年、曾於超過2500部AV作品中擔任「臨時演員」嘅「新城（あらしろ）きっか」罕有地接受日本傳媒訪問，透露AV臨時演員嘅工作內容。

卻說現年43歲嘅「新城（あらしろ）きっか」(以下簡稱「新城」)，早前接受《集英社Online》嘅訪問，透露身為AV臨時演員嘅工作內容。佢話自己早期其實係一名裸體模特兒，亦曾於小成本嘅「粉紅電影」中擔任小配角，所以對於片場有人裸體演出其實非常習慣。但佢就指自己於2008年開始加入AV界、至今演出超過2500部作品當中，從來都冇露出過任何私隱部位，因為佢主要出演嘅係女優嘅媽媽或姐姐、NTR作品中嘅「正印老婆」、冇對白嘅店員、又或者電車痴漢作品中嘅乘客等大家唔會留意，但其實又幾重要嘅角色。

佢指出，或者係因為近年自己年紀大咗，所以最近接到嘅角色好多時都係NTR作品中嘅妻子角色，而呢個角色嘅存在，就係為咗消失，等男優與女優有獨處嘅機會，所以佢笑稱自己今年講咗好多次「嗱，依家媽媽出街啦」。另外佢亦透露，拍攝時佢係要自備服裝 (包括制服)，所以佢會刻意挑選顏色鮮艷嘅衫、又或者準備一個好大嘅袋，以突顯自己嘅角色。

另外一個需要大量臨時演員嘅系列，就係大家熟知嘅「時間停止」系列。新城表示自己作為臨時演員，喺一部作品中要於不同場景「被停止」好幾次，所以必須要搵到個可以舒服地「唔郁」嘅姿勢，而據佢嘅經驗，就咁企喺到就係最舒服嘅。而拍攝電車痴漢作品時，新城作為乘客，又要扮唔知發生咩事，又要自然地做出架車郁緊嘅演技，所以佢通常都會放空個人，諗下「今晚食咩好呢？」

而講到15年生涯中最難忘嘅場面，新城就表示自己作為「演員」，係認真畀心機去做戲，所以如果劇情要佢鬧個女優，佢係真係會出力鬧，有一次仲鬧到個女優真係喊，佢認為咁樣嘅演出係非常成功。而AV記者東風克智就表示，新城提到嘅女優係「永井みひな」，當時永井みひな要飾演一個拒絕做身體檢查嘅女員工，而新城就飾演上司，結果新城真係打咗永井みひな一巴，亦令永井みひな被逼接受檢查個樣非常真實。

資料來源：集英社Online