作為男人，相信大家都有同班兄弟討論過「尺寸」嘅話題。而據一個外國研究發現，男人對於身高、運動能力以至下體大小等顯示「雄性特質」嘅身體數字，都有「報大數」嘅傾向，其中下體大小更加係報大數嘅重災區，甚至有人聲稱自己勃起後長過世界紀錄嘅34cm。

此研究搵黎191名年齡介乎18-35歲嘅丹麥男性，並要求佢哋自行回報4一系列關於購物偏好、個人壽命估計，以及身高、體重、運動能力、下體大小等「雄性特質」數字，而研究團體就會將一眾「雄性特質」數字去同丹麥男性嘅平均數字作對比，以得出有否「報大數」嘅結論。

結果就發現，受訪者於身高、運動能力以及下體大小三方面都有報大數，其中「運動能力」及「高度」嘅報大數程度頗細，例如受訪者回報嘅平均高度，比起丹麥同齡男子嘅平均高度僅高1%。但一去下到「下體大小」，一眾受訪者基本上係「吹得就吹」，得出黎嘅平均勃起長度比起丹麥男子平均數要長21%，當中更有人報出一個比起世界紀錄34cm更長嘅數字。

研究團隊指出，身高、運動能力、下體大小呢啲數字，對男性嘅自尊、自我形象及身份認同息息相關，所以男士們就會傾向報大數以提升自我。而下體大小之所以報得特別誇張，就係因為正常黎講，就算下體報大數都冇人會知，唔似身高能夠輕易做對比而搵出破綻。

資料來源：Smaller prize, bigger size? Exploring the impact of money on men’s self-reported markers of masculinity